Arnaq Johansen – Uangaana timiga

ATUAKKAMI KALAALLIT ARNAT QULIT spiralilerneqarnermikkut inuunerminni qanoq sunnerneqarsimanerat atuarsinnaavat. Oqaluttuarineqartut takisuuliaanngillat, paasiuminartuuppulli naallu qanga pisimasut eqqartorneqaraluartut ippassaq pisimasutullusooq misigissutsinik qaffakaalersitsisuullutik.

Oqaluttuartut timikkut tarnikkullu qanoq kingunerluuteqarsimanerminnik oqaluttuarput, aammali oqaluttuaasa atuarnerisigut maluginngitsoorneqarsinnaanngitsoq tassaavoq inuttaasa qanoq nukittusimatiginerat.

Atuagaq spiralilersuisimanermut tunngassuteqaannanngilaq, aammali tassaavoq arnat inuunerannut, timaannut pisinnaatitaaffeqarnerannullu tunngassuteqartoq, soorlu siuleqummi eqqaaneqartoq inuunermik qulaajaanerit tusarsimanngisaannakkavut ilanngussuunneqartut.